Champions Trophy 2025 : बांगलादेशला पराभवाचे पाणी पाजण्यासाठी भारताचा मास्टर प्लॅन तयार!

Champions Trophy, IND vs BAN Match: भारतीय क्रिकेट संघ सध्या दुबईत असून चॅम्पियन्स ट्रॉफी 2025 (Champions Trophy 2025) च्या मोहिमेसाठी जोरदार तयारी करत आहे. यंदा भारतीय संघाकडे १२ वर्षांच्या प्रतिक्षेनंतर चॅम्पियन्स ट्रॉफी जिंकण्याची सुवर्णसंधी असेल. रोहित शर्माच्या नेतृत्त्वाखालील भारतीय संघ (Team India) 20 फेब्रुवारी रोजी बांगलादेशविरुद्धच्या सामन्याने स्पर्धेचा शुभारंभ करणार आहे. दुबईच्या मैदानावर होणाऱ्या या सामन्यासाठी भारतीय संघाने तगडी योजना आखली आहे.

भारताचा मास्टर प्लॅन काय आहे?
इंग्लंडविरुद्ध नुकत्याच झालेल्या वनडे मालिकेत भारतीय संघाने आपला मास्टर प्लॅन दाखवला होता. प्रशिक्षक गौतम गंभीर आणि कर्णधार रोहित शर्मा यांनी प्लेइंग ११ मध्ये तीन फिरकी गोलंदाजांना संधी दिली होती. भारत पुन्हा एकदा बांगलादेशविरुद्ध त्यांच्या फिरकी त्रिकुटाला उतरवून स्पर्धेची सुरुवात विजयाने करू शकतो. माध्यमांतील वृत्तांनुसार, पहिल्या सामन्यात रवींद्र जडेजा, अक्षर पटेल आणि कुलदीप यादव यांना संधी दिली जाऊ शकते.

अशा परिस्थितीत, यशस्वी जयस्वालच्या जागी चॅम्पियन्स ट्रॉफीसाठी संघात समाविष्ट करण्यात आलेल्या वरुण चक्रवर्तीला संधीची वाट पहावी लागू शकते. वॉशिंग्टन सुंदरच्या बाबतीतही असेच असू शकते. दुखापतीतून परतलेल्या कुलदीप यादवने इंग्लंडविरुद्ध दोन वनडे सामने खेळले आणि दोन विकेट्स घेतल्या होत्या.

यष्टीरक्षक म्हणून राहुल पहिली पसंती 
भारतीय संघाच्या फलंदाजी क्रमात फारसे बदल होण्याची शक्यता नाही. कर्णधार रोहित शर्मासोबत शुभमन गिल डावाची सुरुवात करताना दिसेल. यानंतर, विराट कोहली, श्रेयस अय्यर आणि केएल राहुल फलंदाजी करताना दिसतील. केएल राहुल हा भारतीय संघातील पहिल्या पसंतीचा यष्टीरक्षक फलंदाज आहे आणि मुख्य प्रशिक्षक गंभीर यांनी हे आधीच स्पष्ट केले आहे.

बुमराहच्या अनुपस्थितीत शमीकडून अपेक्षा असतील
जर आपण वेगवान गोलंदाजीबद्दल बोललो तर अर्शदीप सिंग मोहम्मद शमीसह दुसरा वेगवान गोलंदाज म्हणून खेळेल हे निश्चित आहे.
मोहम्मद शमी त्याच्या जलद गोलंदाजीने जगातील सर्वोत्तम फलंदाजांना चकित करू शकतो. या स्पर्धेत शमी भारताला जसप्रीत बुमराहची उणीव भासू देणार नाही, अशी चाहत्यांना आशा आहे.

भारतीय संघ २० फेब्रुवारी रोजी दुबईमध्ये बांगलादेशविरुद्ध पहिला सामना खेळणार आहे. ३४ वर्षीय शमी दुखापतीतून सावरल्यानंतर पुनरागमन करत आहे. त्याने वेगवेगळ्या पातळीवर आणि वेगवेगळ्या फॉरमॅटमध्ये काही सामने खेळले आहेत पण मोठ्या स्पर्धेत अपेक्षा पूर्ण करण्याचा दबाव त्याच्यावर असेल. अशा परिस्थितीत बुमराहच्या अनुपस्थितीत त्याच्यावरील दबाव आणखी वाढेल.

भारताची संभाव्य प्लेइंग इलेव्हन
रोहित शर्मा (कर्णधार), शुभमन गिल, श्रेयस अय्यर, विराट कोहली, केएल राहुल (यष्टीरक्षक), हार्दिक पंड्या, अक्षर पटेल, रवींद्र जडेजा, कुलदीप यादव, मोहम्मद शमी आणि अर्शदीप सिंग.

हेही वाचा-

‘चल जाए तो चांद तक, वरना शाम तक’, Champions Trophy पूर्वी पाकिस्तानी खेळाडूनेच उडवली संघाची खिल्ली